當屬會沒有會員……

試諗一個情況：幾個港大同學突然之間心血來潮，想討論香港的文化保育問題。傾下傾下，想去學生會度睇下幫唔幫到手。

對唔住，請問你有無五十個學生會基本會員簽名支持你成立？

-------------------------------------------------

學生會好有趣。結構上，撇除同學以外，最基本的組織單係係屬會。屬會的定義係，佢會代表一班同學做ABCDEF咁多件事，而憲制上佢亦都代表緊呢堆同學係上一層的組織入面發聲，直至評議會為止。

類似以代表疊代表為中軸的政制唔多，共產政權的制度係一個好好的例子，人民係由生產單位的代表帶領住，然後一層一層咁上到去全國人大/黨大。

呢類制度背後一個好大的理念就係，每一件事，無論係同學福利還是社會運動，都要有一舊好清晰的民意基礎。調轉頭黎睇，每一件事都有一班有心人係後面Check住，應該唔會有乜野事先至係。

睇落好似好合理，但其實係一舊硬膠。

-------------------------------------------------

有問題的第一樣野就係民意基礎。當大家睇到大家對大選的反應係劣到呢個死樣個陣，有幾多民意基礎，大家心中有數。諮詢大會係好無聊，但係幾乎永遠都唔會有普通同學出現。就算依家好多全民大會已經變成自動波過動議的動作，一樣係一個普通同學都無。

所謂民意基礎根本就係一紙空文。就有如我地係內地的同胞一樣，黨有黨講和諧社會，人民有人民無視國家的一切河蟹和Nice Boat.，照舊很好很強大地很黃很暴力。屬會入面的細微操作係點，根本就無普通人肯去明去理。

第二樣係形式主義。唔駛講，繼續可以將個問題指番去諮詢大會個度。不過更加重要的係，當大家想做一個社會運動個陣，一係就旨意有中央幹事會撐住，一係就慢慢儲夠五十條友，再係制度上面碌番一頭半個月(呢個係下限中的下限)，然後再搵廿條友黎撐場去開個會員大會……大佬，兩個月，天星個鐘樓已經畀人扑左落黎喇，呢種冷飯我會選擇落多D膠魚去炒咁囉。

第三樣係連我地自己都係度抱殘守缺，鬥等運到。CA由零零年講起，到零五年先搞得成。Engine下面個幾個會話要附屬，零二年搞到呢幾日先至搞得掂。Inter Hall應該係呢一兩年開始講的事，到依家的實質進度已經趨向零。評議會改革由零四零五度開始講，我地係咪要等到二零一零？二零一二年就轉新學制，係幾個院會都預計會被廢柴化，學術會可以突然坐大—至少在認受性而言—個陣，我地又做左乜野準備呢？

難道，我地要同特首選舉一樣，由二零零七要等到二零一七？

-------------------------------------------------

CEDARS呀莊陳有成日都想佢下面個四壇野(HIF, AAA, CCC，仲有一個唔記得左)附屬落去學生會度。佢地又無可能收Member，亦無可能陪大家搞Campaign搞AGM。但係我地可以畀乜野配套出黎？咁樣落去，因為我地根本容納唔到佢地，咁又憑乜野去批評CEDARS專搞同學生會重疊的動作呢？

係社會運動全面快閃化網絡化的今日，我地又憑乜野堅持陪大家慢慢煲老火湯？我地又憑乜野去拎住學運=社會先驅呢個光環？

再退一步咁講，畀屬會變成一堆推廣XX推廣YY的同好會會唔會仲好？點解要將收會員變成結社的先決條件？

-------------------------------------------------
最根本的解決方法，係放棄屬會=民意代表的錯誤假設，而將個重點放係莊呢一個行動單位上面。當然細節野需要再研究，但係正正因為咁，我地好可能又要花五年時間去砌佢地出黎。以前的事大家可以當無到，依家面對的問題無得殺到埋黎先講。

坐言，就要起行！