舍堂：這只是一個欽定的黑盒子！

(聲明：本人從未成為，亦永遠不會成為任何舍堂的一份子或任何宿生會的會員)


歡迎來到港大兩大神壇之首：舍堂。(另一個就係上莊。)

先唔講舍堂文化，我地應該由Admission開始做起。其實依家Hall的Admission制度究竟係乜野家伙？所謂七三制度，其實又係乜野？

七三制簡單黎講，就係話七成的宿生係計分(呢一個計分係由CEDARS去做的，我地無理由認為佢有作弊的打算)，三成的收生係由宿生會自己決定。睇落好似好完美咁，有必要的同學又有份，Hall鍾意乜野人又有足夠的空位去收。

問題係，個三成點樣決定已經係一個黑盒，外人無從得知，亦無所得知究竟佢地係基於乜野準則去決定邊個人可以住，難聽個句，係無王管。加上又有某幾間Hall認為七三應該係成間Hall一齊計而唔係斷Admission去計，基本上七三已經成為「受限制地自由收生」的代名詞。

實際上，成個系統都係一個黑盒。

--------------------------------------------------

寫左一大段Admission的問題，講到尾，係因為呢樣野點樣處理，非常影響舍堂文化會變成乜樣。我唔敢講話黑箱作業會得出一個黑箱文化，但好顯然呢個黑箱的操控者認同的文化就係大家要接受的一套文化。

我地得到一個好好笑的結論。如果我地相信文化係一班人的價值的最大公因數，咁依家講緊的舍堂文化根本就唔係文化，而係一種制度。比如話，一個人生於中國內地，不但要相信自己係一個中國人，而且仲要相信一黨專政係一個好制度；同理，一個生於美國的人一定要相信兩黨制才是宇宙正制。

呢個就係點解我地可以輕易咁睇得出一個人係來自乜野Hall，唔係因為佢地的文化係甲或者乙，而係因為唔認同甲或者乙的話你根本連住都無得住。

甚至用同一個理由，亦都可以解釋到點解由沙宣三寶開始，咁多個將新Hall同舊Hall分流的社會實驗都失敗—因為你一日唔認同「主流價值」，一日你都係二等公民，就同升唔到仙的理由一模一樣。

絕望了！我對一式一樣的舍堂文化絕望了！(糸色望調)

--------------------------------------------------

如果大家有睇政綱的話，應該會知道我係贊同所謂十零制—舍堂本身無揀人的權利。舍堂揀人，最後得出的唔係保存文化，而係由得一班人係度控制文化的定義。

舍堂無揀人的權利唔代表文化唔可以保存落去。如果一套文化無人接受的話，係應該睇下點解無人去成為信徒，然後從一個新的人口結構中搵出下一個最大公因數，而唔係好似依家咁，先決定乜野係公因數然後再搵一堆符合條件的人。

香港的文化日日都係度變緊。作為年輕人，大家都應該知道老一輩的道德教化係保存文化之中有幾咁廢柴。只不過再廢柴都好，都仲未有人敢話你唔點點點就無資格做一個香港人。不過港大入面就充滿住呢一類思想，而且真係有憲定程序去決定你係唔係一個xx人yy人。

畀舍堂揀人就係咁恐怖。我地係咪犧牲左太多舍堂文化的可塑性了？

--------------------------------------------------

自由組合並唔代表舍堂文化會消失。自由組合意味住中間唔會有太大的主流意見，相反，一些基本的價值其實更易被塑造出黎，更容易咁得到一班青年人所認同。記住佢地係青年人，唔係十零歲細路哥，鬧佢地會驚，但係唔會聽。

發展舍堂文化，最根本的方法就係將現有的一套，配合新的人口結構再加以配合。舊儀式可以賦予新的意義，動作的重要性係要靠勸說而唔係家長式咁去教。

真係無左意義的，應該直接拎去垃圾桶處理左佢。孔子教要守孝三年，依家呢？係濃縮到二十四小時內可以完成的殮葬儀式。點解？因為二十一世紀入面根本就無人可以守三年孝！

難聽個句，如果全部人都係撻皮的話，就由得佢地撻啦！撻皮都係文化的一種！

--------------------------------------------------

點解咁多人住Hall係睇住最低要求黎住？因為有欽定的舍堂文化。
點解年年都會出現屬會派大戰舍堂派的連續劇？因為有欽定的舍堂文化。
點解出面人對港大舍堂睇法咁兩極化？因為有欽定的舍堂文化。
點解其它大學的Hall常滿，港大卻常吉？因為有欽定的舍堂文化。

舍堂文化本身唔係問題。但係無可能以為靠欽定就可以坐食山崩。
要改變呢個欽定情況，最簡單的方法就係將佢地頭殼頂上面的光環—即欽定權拎走。

當一個黑盒子變成一個全盤透明的制度個陣，欽定就唔會再有市場。

請支持舍堂收生全面十零制。