開門見山。
所謂Endless Campaign的事已經說了不知多少年月，是時候去尋找一個長遠的處理方案了。
兩年前作的調查，每一個屬會平均在一個諮詢大會之上使用了二十多小時，即使我們保守的算，一百個屬會每一個用二十小時，就是二千小時的時間。
這是多麼恐怖的數字。
二千小時，就算我們再保守一點算，每一個屬會的候選內閣只有七個人，那就是一萬四千小時。就算以麥當勞的二十元時薪來算(以一個大學生來說，這是很不堪的數字了)那是二十八萬元的社會成本。
二十八萬。這還沒有算上如上莊等的其它參與者，還沒有算上模擬諮詢大會，模擬模擬諮詢大會……但這個極為低估的數字，已經超過整個學社聯會或文化聯會一年所獲得的資助，又或者夠搞多一份學苑。
如果認真將所有涉事的人士都包含在內的話，數字好可能會超過一百萬。我手上無準確數字，不過應該夠中大學生報用足一年。
呢個數字仲未計大家通宵過勞所做成的生產力下降，走堂浪費的學費，以及睡眠不足對身體做成既傷害。
-------------------------------------------------
我們很難想像這種破費會出現在二零零八年的今天。我們可以用電郵，電話，吹水食飯，甚至靠上莊寫報告的方法去提點候選幹事，而這些方法，斷然會比在諮詢大會之上逐個排隊問問題答問題來得有效率。
進一步講，其實成個諮詢大會的存在係因為有人(不論係老鬼、上莊定同學)有實質野問。不過問一盤魚蛋幾錢、香港地震個活動點算、甚至莊入面的拍拖政策呢類Kuso，就真係唔知究竟有幾實質，有乜野意義。去搞一個莊無錯係要知道做野幾多錢，係要知道有意外事件出現個陣點算，係要知道點樣處理人際關係，但係一黎呢類野唔需要係半年之前準備，二黎亦唔需要真係做到無懈可擊，三黎亦都唔需要應付各位老人家的獵奇心理。
難聽個句，呢類問題的存在，係畀老鬼一個機會去宣示自己識野多過你班新仔，係話畀新莊知我仲可以做得好過你，係話畀新莊知我係一個老鬼，我天生就大過你。一切的為莊好一類論調，根本只係自己送畀自己的光環，只係一種極度文明的自慰。
當理大都開始放棄無盡Consultation的同時，我地就將呢樣爛橙當係寶一樣，舉到同舍堂文化一樣咁高的神壇上面。
-------------------------------------------------
我唔係話諮詢大會本身就係邪惡的行為，但係一方面大家係度講諮詢大會長有幾唔好唔好，另一方面又係度討論邊個屬會又破紀錄，全場流左幾多立方米眼淚，呢種畸胎可謂精神分裂的產物——無錯，精神分裂又係港大人的另一樣特產，我地叫佢做睇時勢做人。同一件事可以同時地必要但天地不容。
大家如果有野講的話，可以用更加好的方法。呢個世界有電話，有Email，有MSN，有Forum，Blog，甚至可以傳統少少咁留紙仔，飲茶食飯等等九千幾種方法，實在無任何必要將自己困係一個唯一就是正統的籠入面。
請反對長時間，不人道，影響作息，無普通人參與，無實質內容的諮詢大會。
No comments:
Post a Comment